Ang maikli naming kwento

Tayo ang may-akda ng sarili nating kwento
Na unti unting sinusulat ng panahon
Sa bawat kaganapan, desisyon at tatahaking destinasyon.
Ay unti unting mong iniipon ang bawat pahinang nagiging
kabanata ng buhay mo paglipas ng maraming taon.

Naniniwala ako na ang bawat istorya ay dumudugtong sa
taong nakakasalamuha mo.
Dumudugtong ang bawat kabanata at sumusulat ng panibagong buod
Dudugtong sa kwento ng bawat taong ipagtatagpo sa atin ng panahon.

Katulad ng dalawang taong pinagtagpo
Na may kanya kanyang kwento
Hindi mo alam sa umpisa ang mga karakter nito
na habang tumatagal ay unti unting nakikilala mo.
Habang tumatakbo ang panahon
Ay dahan dahang pagkumpas ng bawat pahinang
sinasalaysay ang kanyang kanyang ninyong kwento.

Katulad ko na pinagtagpo sa taong parehong may istoryang kumplikado
Kung saan ang saya ng panimula nito
na para bang walang suliraning haharapin hanggang dulo .

Lumaban ako sa tunggalian ng ating kwento kahit alam kong napakagulo
Katuparan o kasawian man ang sukdulang makakamtan ko
Maging matagumpay lang ang kakalasan nito upang mahagkan lang ang masayang wakas at tagumpay ng ating kwento ay lumaban ako.
Ngunit nagkasalubong tayo sa gitna ng ating kanya kanyang kwento.

Tila nagsabong ang mga pangyayaring kumplikado
Pinilit na lang bigyang koneksyon ang nilalaman nito.
Aking napagtanto na kasawian pala ang aking matatamo,
sa sukdulang paparating sa mga susunod na kwentong barberong isinusulat mo.

Inayos ko at hinanap ang papalabas sa ating kwento para simulan muli ito
Umaasang magiging masaya ang katapusan nito
Ngunit wala ka na, wala na ang isang importanteng karakter o bida
Hanggang sa lumala, di na alam kung paano tatapusin ang pa. Pipilasin ko na ba?

Kaya aking sinimulan
Hinahanap ko ang susi ng pinto kung saan mahahanap ko ang kakalasan
Ngunit di na magawang iangat ang aking mga kamay
Sadyang wala na pati ang sarili kong kalakasan
Nanginginig na at hindi na kayang ipagpatuloy pa
Ang mga sinimulang ginulo nating dalawa

Kahit may nalalabi pang mga tinta , pawang pasmado na
Kahit makaisip ng mga kataga ay di na kakayanin pa
Mga salitang di na magtugma tugma, wala ng saysay kung magsasalaysay pa
Dahil ang mga bida ay di na makarating sa bawat tagpuan nila.
Di na magkakitaan. Wala na ang tagpuan nila.

Kaya ito'y aming pinutol na, tinanggal ang mga pahinang pinag ugnay naming dalawa
Ang dalawang librong pilit pinag isa.
Unti unting tinahi ang mga napunit at nayupi yuping kabanata.
Unti unting binalik ang masasayang panimula, inayos ang naging tunggalian
Iniwasan ang magiging sukdulan hanggang makamit ang kakalasan
Muling ibinalik ang dapat na masayang katapusan.
Kaya ito ay amin nang winakasan.

-Haponesang Hilaw