Marupok

Oo bulag ako, bulag nga ako

Tamisan mo ng konti ay kikiligin ako

Lambingin lang ng konti pag sa isa't isa ay may tampo ay makikipagbati ako

Kahit ikaw pa ang may kasalanan, kakalimutan ko

Kasi nga ganito ako! Marupok lang talaga ko

Kaya saglit.. Hinay hinay sa pag bitaw ng mga salitang matatamis, na baka ako ay kiligin,

Di ko maiiwasan at baka hindi ko mapigil ang aking mga ngiti

Saglit.. Dahan-dahan sa pagpapa kilig, baka di ko maiwasan ang puso kong kay bilis makiliti

Saglit.. Nakakahiya man pero kasi ang bilis kong mahulog, kaya saglit

Kung di mo rin naman pala ako kayang alayan ng pag-ibig

Eh saglit, wag mo na sana pang ipilit.

Noong ika-dalawampu ng Abril, alas dyis ng gabi kung saan sasalubong ang hating gabi,

Ako'y iyong hinatid, naalala ko pa noon ang lakas ng kaba sa aking dibdib,

Tibok ng puso kong walang patid

Naglalakad tayong dalawa, at hindi ako mapakali

Habang tayong dalawa ay nagtatawanan ay bigla mo na lang binanggit

"Ingat ka hah sa mga sasakyang puti, nangunguha yan ng mga taong marupok sa pag-ibig"

Tila binuhusan ako ng isang baldeng tubig na kay lamig

Pinigil ang mga matang gustong magtangis

Nilingon at tinitigan kita, ayokong magpadala sa maamo mong itsura

Tinitigan parin kita, ngunit sinuklian mo lamang ako ng pagtawa kaya ako'y napangiti na lang

Bigla ka na lang nagulat sa mga palad kong bigla na lang

humampas sa mga braso mong kay lakas.

Sabi mo pa "Ay grabe sya"

Gustong pumatak ng aking mga luha sa aking mga mata

Gustong tanungin ka..

"Yung paibigin ako? Sinadya mo lang ba?"

Kasi nasa tuktok na ako kung saan damang dama ko

Kung kailan malinaw na ang lahat sa isip ko

Kung saan nagsusumigaw na ako

Na ito na ko, mahal na din kita gaya ng sabi mong mahal mo ko at ako'y iyong iyo.

Marupok nga siguro ako, dahil ang bilis kong nagpabitag sa mga titig mo

Hinayaang magpalunod sa mga yakap mo

Hinayaang magpagapos sa mga haplos mo

Hinayaang magpapana kay kupido at maging biktima nito

Bakit kasi hinayaang kong salubungin ka nung ang mga mata natin

ay nagkasalubong kaya siguro tayo napahinto.

Sa daang kung saan tinatahak natin ay bigla tayong nagkatagpo

Sadyang mapaglaro, tadhanang mapanglilo.

Nanatili sa estadong hindi naman sigurado.

Hanggang napagtantong naglalaro na lang pala tayo.

Nahulog ako sayo, ngunit hindi mo naman sinalo.

Nagpagapos nang di man lang sinigurado na kung nasa iyo ang mga susi ng kandado.

Nagpadala sa karupukan ko.

Sinubukan mo lang pala ako.

-Haponesang Hilaw