Geometrika

Anong hugis ba ang pintuang papasok sa mundo mo?

Dahil hindi ko makuha ang tamang hugis papasok sayo

Parisukat ba o bilog, pahaba ba o tatsulok?

Baka sakaling kayang hulmahin ang sarili ko kahit pa tuldok

Ilang beses na nga bang nangahas at sumubok

Ilang beses na rin bang binago tumama lang ang mga sukat nito

Di parin pala sasakto, ang sariling pinagpipilitan sa masikip mong mundo.

Masikip nga ba ang mundo mo

O sadyang ako lang ang di makapasok dito?

Mabuti pa ang sardinas, kahit madami ay may konting espasyo

Samantalang akong nag-iisa, di pa magawang magkasya sayo

Ano nga ba? 

Tanong ko nga, ano ba ang tamang sukat?

O kailangan kong baguhin ang katanungan, ano ba ang tamang sukatan?

Ilang metro ba ang kailangan, ilang grado o sentimetro pa ba?

Kailangan ko pa bang banggitin kung anong metriko talaga ang kinakailangan?

Sabihin mo lang kung ano ang nararapat sa iyong pamantayan.

Alam ko sa sarili ko na kahinaan ko ang matematika

Pero kakayanin ko dahil ikaw ito, para sayo

Maunawaan ko lang kung ano ba talaga ang takbo ng isip mo

Magbabalik-tanaw ako ng geometriko

Kahit alam kong di naman ako makakapagtapos sayo

Bibilangin ko ang probabilidad na maging isa tayo

Pagdutugtungin ko ang bawat tuldok at punto

Susukatin ang eksaktong mga pagitan nito

Hahanapin ko, ang ating tamang angulo

Masiguro lang na magkakoneksyon tayo.

  

Kung sakali mang di umubra ang pag-aaral ko ay maghahanda ako.

Tantyahin ko ang lahat ng hahakbangin ng mga paa ko,

kung ilang baitang, talampakan pa ba ang dapat tahakin papalapit sayo.

Mahulog man ako ay alam ko ang eksaktong bilang pabalik sayo.

Paghahandaan ko, na parang pagsusulit ang mga ito.

-Haponesang Hilaw